నిజామాబాద్, 2026-06-05
సిరికొండ మండలంలోని హుస్సేన్ నగర్ బీట్ పరిధిలో అరుదైన రస్టీ స్పాటెడ్ క్యాట్ మృతి చెందింది. బొడ్డు మామిడి చెరువు సమీపంలో రోడ్డు పక్కన ఈ జంతువు కళేబరాన్ని అటవీశాఖ అధికారులు గుర్తించారు. ఇది వన్యప్రాణి సంరక్షణ చట్టం ప్రకారం షెడ్యూల్-1లో ఉన్న అరుదైన జాతి అని అధికారులు తెలిపారు.
సిరికొండ మండలంలోని హుస్సేన్ నగర్ బీట్ పరిధిలో, కంపార్ట్మెంట్ నంబర్ 408లో బొడ్డు మామిడి చెరువు సమీపంలో రోడ్డు పక్కన అరుదైన రస్టీ స్పాటెడ్ క్యాట్ (తుప్పు రంగు మచ్చల పిల్లి) మృతి చెందినట్లు అటవీశాఖ అధికారి నర్సింగ్ రావు తెలిపారు. మృతదేహాన్ని పరిశీలించిన అధికారులు, ఇది రస్టీ స్పాటెడ్ క్యాట్గా నిర్ధారించారు.
వన్యప్రాణి సంరక్షణ చట్టం ప్రకారం షెడ్యూల్-1లో ఉన్న ఈ జంతువు అరుదైనదని వారు పేర్కొన్నారు. సిరికొండ అటవీ క్షేత్రాధికారి అనుమానాస్పద వన్యప్రాణి మృతిగా కేసు నమోదు చేసి దర్యాప్తు చేస్తున్నారు. శవపరీక్ష అనంతరం మృతికి గల కారణాలు వెల్లడిస్తామని వారు తెలిపారు.
అటవీ ప్రాంతాల్లో ప్రయాణించే వాహనదారులు గంటకు 30 కిలోమీటర్లకు మించకుండా వాహనాలు నడిపి, వన్యప్రాణుల రక్షణకు సహకరించాలని జిల్లా అటవీశాఖాధికారి కోరారు.
