జిల్లా కేంద్రంలోని ఖిల్లా రామమందిరంలో ఆదివారం శ్రీ సీతారామచంద్ర స్వామివారి కల్యాణ మహోత్సవాన్ని అత్యంత వైభవంగా నిర్వహించారు. ఈ సందర్భంగా ఆలయ అభివృద్ధికి కృషి చేస్తున్న అర్బన్ ఎమ్మెల్యే ధన్పాల్ సూర్యనారాయణ గుప్తా, మాజీ చైర్మన్ ముక్క దేవేందర్ గుప్తా, కళ్యాణ దాతలను ఘనంగా సన్మానించారు.
పునర్వసు నక్షత్రాన్ని పురస్కరించుకుని జరిగిన ఈ కల్యాణ మహోత్సవంలో అభిజిత్ లగ్న సుముహూర్తంలో శ్రీ కందాలై నరసింహమూర్తి (నాని స్వామి) ఆధ్వర్యంలో వేదమంత్రాలు, మంగళవాయిద్యాల నడుమ వేడుకలు భక్తులను అలరించాయి. పెండ్యాల శ్రీనివాస్ గుప్తా (వాసు), శివకుమారి దంపతులు ఈ కల్యాణానికి దాతలుగా వ్యవహరించారు. శ్రీనివాస్ గుప్తా 60వ జన్మదినం సందర్భంగా నిర్వహించిన షష్టిపూర్తి వేడుకల్లో భాగంగా ఈ కల్యాణాన్ని జరిపించారు.
తొలుత విశ్వక్సేన ఆరాధన నిర్వహించి, అనంతరం సీతారామచంద్ర స్వామివారి ఉత్సవమూర్తులను సుందరంగా అలంకరించి ప్రత్యేక పూజలు చేశారు. కల్యాణ ఘట్టాలు, మంగళవాయిద్యాలు వంటి కార్యక్రమాలు భక్తులను విశేషంగా ఆకట్టుకున్నాయి. ఆలయ కమిటీ మాజీ చైర్మన్ ముక్క దేవేందర్ గుప్తా మాట్లాడుతూ ఆలయాభివృద్ధికి సహకరిస్తున్న ప్రతి ఒక్కరికి ధన్యవాదాలు తెలిపారు.
ముఖ్య అతిథిగా హాజరైన అర్బన్ ఎమ్మెల్యే ధన్పాల్ సూర్యనారాయణ గుప్తా స్వామివారికి ప్రత్యేక పూజలు నిర్వహించి, ఖిల్లా రామమందిరం అభివృద్ధికి తన వంతు కృషి చేస్తానని హామీ ఇచ్చారు. ఈ సందర్భంగా కళ్యాణ దాతలైన పెండ్యాల శ్రీనివాస్ గుప్తా, శివకుమారి దంపతులను అర్బన్ ఎమ్మెల్యే ధన్పాల్ సూర్యనారాయణ గుప్తా దంపతులు, కమిటీ సభ్యులు ఘనంగా సన్మానించారు.
అహర్నిశలు ఆలయ అభివృద్ధికి కృషి చేస్తున్న అర్బన్ ఎమ్మెల్యే ధన్పాల్ సూర్యనారాయణ గుప్తాను, ముక్క దేవేందర్ గుప్తాను పెండ్యాల శ్రీనివాస్ దంపతులు, ఇందూరు బ్రాహ్మణ సేవా సంఘం అధ్యక్షులు పండరి సత్యనారాయణ రావు, ఆలయ కమిటీ సభ్యులు ఘనంగా సన్మానించారు. కల్యాణ మహోత్సవం అనంతరం భక్తులకు తీర్థప్రసాదాలు అందజేశారు. మహా నైవేద్యం సమర్పించిన అనంతరం అన్నప్రసాద వితరణ చేపట్టారు.
ఖిల్లా రామమందిరంలో తరచూ ఇటువంటి ఆధ్యాత్మిక కార్యక్రమాలు నిర్వహించడం ఎంతో సంతోషంగా ఉందని భక్తులు ఆనందం వ్యక్తం చేశారు. ఈ కార్యక్రమంలో ఆలయ పూజారి సందీప్ తివారి, కార్పొరేటర్ శ్రావణ్, ఆలయ కమిటీ ట్రస్టు సభ్యులు చల్ల గంగాధర్, పడిగెల నాగనాథ్, మంచాల జ్ఞానేందర్, కే అశోక్ కుమార్, పండరి సత్యనారాయణ రావు, జితేందర్ రెడ్డి, అశోక్ పాల్గొన్నారు.
