నిజామాబాద్ జీజీహెచ్ లో తీవ్ర సిబ్బంది కొరత; రోగులకు సేవలు అందడం కష్టతరం

రాష్ట్ర ప్రభుత్వం ఇటీవల నిర్వహించిన బదిలీల ప్రక్రియలో నిజామాబాద్ జీజీహెచ్ నుంచి 36 మంది డాక్టర్లు ఇతర ప్రాంతాలకు బదిలీ కాగా, తిరిగి కేవలం 11 మంది మాత్రమే వచ్చారు. దీంతో మొత్తం మంజూరైన 272 డాక్టర్ పోస్టులలో ప్రస్తుతం 145 మంది మాత్రమే విధుల్లో ఉన్నారు. ఫలితంగా 127 డాక్టర్ పోస్టులు ఖాళీగా మిగిలాయి.

డాక్టర్లతో పాటు, నర్సింగ్ సిబ్బంది కొరత కూడా ఆసుపత్రిని వేధిస్తోంది. బదిలీల్లో 48 మంది నర్సులు వెళ్లిపోగా, వారి స్థానంలో కేవలం 11 మంది మాత్రమే వచ్చారు. దీంతో మరో 37 నర్సింగ్ పోస్టులు ఖాళీ అయ్యాయి. ఈ కొరత ఇన్ఫేషెంట్లకు సేవలు అందించడంలో ఇబ్బందులు సృష్టిస్తోంది. గత పదేళ్లలో ఇదే అత్యధిక ఖాళీల సంఖ్య అని ఆసుపత్రి వర్గాలు ఆందోళన వ్యక్తం చేస్తున్నాయి.

ప్రస్తుతం ఆసుపత్రిలో రోజుకు సుమారు 1800 నుంచి 2000 మంది ఓపీ రోగులు వస్తుండగా, 120 మంది ఇన్ పేషెంట్లుగా చేరుతున్నారు. అన్ని విభాగాల్లో కలిపి 800 నుంచి 900 మంది రోగులకు చికిత్స అందించాల్సి ఉంటుంది. వర్షాకాలంలో రోగుల సంఖ్య మరింత పెరిగే అవకాశం ఉన్నందున, సిబ్బంది కొరతతో సేవలందించడం కష్టతరం అవుతుందని అంచనా వేస్తున్నారు.

ఇంతలో, ఆసుపత్రి సూపరింటెండెంట్ పదవిలోనూ మార్పులు చోటు చేసుకున్నాయి. గతంలో అధునాతన సేవలను అందుబాటులోకి తెచ్చిన సూపరింటెండెంట్ నాగమోహన్ హైదరాబాద్ కు బదిలీ అయ్యారు. ఈ మార్పుల వల్ల ఫోరెన్సిక్, జనరల్ మెడిసిన్, జనరల్ సర్జరీ, మానసిక వైద్యం, బయోకెమిస్ట్రీ విభాగాల్లో సేవలు ప్రశ్నార్థకంగా మారాయని తెలుస్తోంది.