ఆంధ్రప్రదేశ్ ఉపముఖ్యమంత్రి మరియు జనసేన అధినేత పవన్ కళ్యాణ్, అరుదైన జన్యుపరమైన కండరాల క్షీణత వ్యాధితో బాధపడుతున్న 17 ఏళ్ల వీరాభిమాని పొనుగంటి నిరంజన్ను స్వయంగా కలిసి, రూ. 1 లక్ష ఆర్థిక సహాయం అందించారు. బాలుడికి పెంపుడు కుక్కపిల్ల, తల్లిదండ్రులకు క్యాంటీన్ ఏర్పాటు చేస్తానని హామీ ఇచ్చారు.
హన్మకొండకు చెందిన పొనుగంటి నిరంజన్, దుషెన్ మస్కులర్ డిస్ట్రోఫీ అనే అరుదైన వ్యాధితో బాధపడుతూ మంచానికే పరిమితమయ్యాడు. తనను కలవాలని నిరంజన్ కోరుకున్న వీడియోను చూసిన పవన్ కళ్యాణ్, బుధవారం నేరుగా బాలుడి ఇంటికి వెళ్లి అతన్ని పరామర్శించారు. సుమారు 45 నిమిషాల పాటు నిరంజన్తో గడిపిన పవన్, అతని కుటుంబానికి ధైర్యం చెప్పారు.
పవన్ కళ్యాణ్, నిరంజన్ వైద్య ఖర్చుల కోసం రూ. 1 లక్ష నగదును అందించారు. అంతేకాకుండా, బాలుడి కోరిక మేరకు ఒక పెంపుడు కుక్కపిల్లను ఏర్పాటు చేస్తానని, దీని కోసం యజమానితో స్వయంగా మాట్లాడతానని తెలిపారు. నిరంజన్ తల్లిదండ్రుల జీవనోపాధి కోసం ఒక క్యాంటీన్ ఏర్పాటు చేస్తానని కూడా హామీ ఇచ్చారు. నిరంజన్ కుటుంబానికి తిరుమల శ్రీవారి తీర్థ ప్రసాదాలను కూడా అందజేశారు.
నిరంజన్ తనను తాను "చోటా గబ్బర్ సింగ్" అని పిలుచుకుంటాడని తెలిసి పవన్ కళ్యాణ్ భావోద్వేగానికి లోనయ్యారు. క్లిష్ట పరిస్థితుల్లోనూ నిరంజన్ చూపిస్తున్న ధైర్యం, ఆత్మవిశ్వాసం తనకు స్ఫూర్తినిచ్చాయని పవన్ కళ్యాణ్ తన 'ఎక్స్' ఖాతాలో పేర్కొన్నారు. గతంలో నిరంజన్ ఆరోగ్యంగా ఉన్నప్పుడు పవన్ సినిమాలకు చేసిన డాన్స్ వీడియోలను చూసి ఆయన ముగ్ధుడయ్యారని తెలిసింది.
బాలుడిని పరామర్శించిన అనంతరం, పవన్ కళ్యాణ్ వరంగల్ భద్రకాళి అమ్మవారిని దర్శించుకుని, నిరంజన్ త్వరగా కోలుకోవాలని ప్రత్యేక పూజలు చేశారు. ఈ సంఘటన పవన్ కళ్యాణ్ మానవత్వాన్ని చాటుతుందని పలువురు అభిప్రాయపడ్డారు.
